By BiliranIsland.com Staff
Published 11:25 AM, July 1, 2021
BiliranIsland.com
Caibiran, Biliran— Gipasakaan na ug kasong paglapas sa RA10591 ang balaud kabahin sa paghupot ug dili lisensiyadong armas, bala ug pabuto, lakip na usab alarm and scandal didto sa Provincial Prosectors Office sa lungsod sa Naval Biliran niadtung Biernes Hunyo 25, ang usa ka mag-uuma nga nagbahis tongod sa kahubog ug nakuhaan ug armas sa mga miresponde nga pulis mga alas 6: 00 sa kahapunon nadtung Huwebes Hunyo 24, didto sa Sitio Miyape, Brgy. Bariis, Caibiran, Biliran.
Giila sa hepe sa Caibiran Police Lt. Vic Viros, ang suspek nga si Cesario Brobo, 52, adunay kaipon, usa ka mag-uuma ug residente sa nahigutang lugar.
Matud pa sa kapolisan nga ilang girespondehan ang usa ka tawag sa celfone gikan sa usa ka concern citizen didto sa Brgy Bariis tongod kay aduna kunoy kaguliyang didto niadtung orasa. Pag abot nila sa lugar ilang naabtan ang hubog kayo nga suspek nga didto pa sa lugar. Sa dihang ila kining gisita ug gibadlong nakita nila nga ang suspek adunay kalibre .38 nga pusil.
Ila gilayon gipangutana kung aduna ba siyay mga dokumento sa legalidad nga paghupot sa naasoy nga armas ug mitubag kini nga wala. Busa ila gilayon kining gisikop ug gipasabot sa iyang mga katongod human sa pagbasa sa Miranda Doctrine.
Ang suspek gidala sa kapolisan ngadto sa ilang estasyon nga way tingog tingog. Pagka ugma sa dihang nahuwasan na usa pa kini nagbasol sa iyang gihimo. Gipasakaan gilayon siya sa mga nahisgutang mga gilapas nga balaud ug kasamtangan kini karon nga nagtingkagol sa selda sa Caibiran Police Station.
