OPISYAL NGA PAHAYAG SA BILECO MAHITUNGOD SA MGA POWER OUTAGES NGA NASINATI SA MILABAY NGA PIPILA NA KA SEMANA

BILIRAN ELECTRIC COOPERATIVE, INC.
(BILECO)
Caraycaray, Naval, Biliran
Tel Nos. (053) 500-9039 to 42
Fax No. (053) 500-9744
e-mail: [email protected]

Ang Biliran Electric Cooperative, Inc. (BILECO) buot mohatag og klaripikasyon ngadto sa mga miyembro-konsumedor og sa publiko sa mga panghitabo sa milabay nga pipila na ka semana diin ang atong area coverage nga gilangkoban sa mga lungsod sa Almeria, Biliran, Cabucgayan, Caibiran, Culaba, Kawayan og Naval nakasinati og mga power outages diin ang uban niini mikabat og sobra sa dose ka oras.

Una, kasagaran sa atong mga nasinati nga power outages sa milabay nga pipila na ka semana may kalabotan sa mga problema teknikal sa mga kahimanan sa National Grid Corporation of the Philippines o NGCP nga kanhi mao ang National Transmission Corporation o TRANSCO. Ang NGCP ilawom sa Power Industry Reform Act of 2001 (RA 9136) mao ang ahensiya nga gitahasan sa paghatod sa elektrisidad gikan sa mga planta sa kuryente padulong ngadto sa mga electric distribution utility sama sa BILECO. Ang atong kooperatiba sa elektrisidad lakip na ang DORELCO, LEYECO 3 og LEYECO 5 Sambulawan Sub-Station ana-a nakakabit sa 69 KV Tunga Feeder sa NGCP. Ang BILECO adunay kopya sa mga interruption report gikan mismo sa NGCP lakip na ang usa ka letter assurance gikang kang NGCP District 3 Department Manager Leo Rustom V. Solon nga ilang paga aksiyonan ang mga problema diha sa ilang linya.

Ikaduha, ang NGCP usa ka pribado nga korporasyon diin ilawom sa balaod gihatag kanila ang tibu-ok nga responsibilidad diha sa mga electric transmission facilities lakip na ang pag skedyul og mga repairs og maintenance diin makasinati og power outages ang mga distribution utilities nga nakakabit sa mga apektadong linya nila. Ang BILECO walay kontrol sa oras og gidugayon sa mga power outages diha sa linya sa NGCP.

Ikatulo, adunay pipila usab ka mga power outages nga nahitabo diha sa mga linya sa atong kooperatiba diin ang pinakadugay mao kadtong insidente nga nahitabo niadtong Pebrero 13, 2009 sa alas 7:04 sa gabie hangtod sa ala 1:56 ang takna sa hapon niadtong Pebrero 14, 2009 diin apektado ang atong serbisyo sa elektrsidad sa tibuok Feeder 2 nga gilangkoban sa mga distrito sa Culaba, Caibiran, Cabucgayan og usab pipila ka mga barangays sa Biliran og Kawayan. Ang hinungdan sa maong insidente mao ang pagkalukapa sa upat ka mga poste sa atong backbone o main line diha sa Brgy. Balaquid og Brgy. Looc sa distrito sa Cabucgayan tungod sa kusog nga hangin og ulan nga nasinati sa maong lugar og ngani gikinahanglan pa nga e-chainsaw sa atong mga kawani nga mi responde ang mga punoan og sanga sa gmelina nga nangahagba diha sa kakalsadahan aron lang makaagi ang atong mga behíkulo og uban pang mga ekipo nga gigamit sa pag rehabilitar sa apektadong linya.

Ikaupat, ang nahitabo nga mga power outages lokal man o sa transmission side nakaapekto og dako sa panudlanan sa atong kooperatiba diin gibana-bana nga ana-a sa 2,040 ka kilowatt-hours ang mawagtang matag oras nga walay kuryente ang atong linya. Sa milabay nga duha ka bulan ang atong kooperatiba wala usab makakolekta sa sigo nga kantidad niini tungod sa mga serye sa pagkapalong sa kuryente

Ikalima, ang BILECO usa ka non-stock, non-profit electric cooperative ilawom sa Presidential Decree No. 269. Kini usa ka regulated entity sa Energy Regulatory Commission og usab ilawom sa supervision sa National Electrification Administration. Ang policy making body niini gikompone sa general assembly og sa mga Board of Directors nga inyong gipili pag representar sa inyong tagsa-tagsa ka mga distrito. Ang management og mga kawani niini miagi og paghashas sa ilang mga kwalipikasyon diha sa pagkapot sa mga katungdanan nga gisangon kanila.

Gipasalig sa BILECO ngadto sa mga miyembro-konsumedor og sa publiko nga walay mga pulitiko o si bisan kinsa nga mga impluwensiyal nga mga tawo diha sa atong sosiyedad nagadikta sa operasyon niini. Ang BILECO taliwala niini nga mga kakulian mopasalig sa padayon nga pag implementar sa mga programa ug kanunay sa pakipagkoordinasyon sa NGCP aron malikayan ang susamang power outages ug aron mas mapalambo pa ang atong serbisyo sa elektrisidad dinhi sa probinsiya sa Biliran.