BiliranIsland.com Staff
BiliranIsland.com
First Posted 15:10:00 03/02/2015

Police impostor nabbed in Ocmoc City, and then allegedly found with shabu paraphernalia when released. The suspect is Ronald Allan Vicera aka R.A., 29, from Naval.

ravicera

Lalake nga nagpailang pulis, sikop
02-27-2015
John Kevin D. Pilapil
Power 90.3 FM/Serbisyo Publiko Sa Radyo

LEYTE- Nabilango sa selda sa Police Station 1 dakbayan sa Ormoc ang usa ka lalake nga gisikop kahuman kini giingong nagpailang pulis sa usa ka gasolinahan sa dan Real ganihang buntag.
Giila ang suspek nga si Ronald Allan Vicera, 29, taga Naval, nagpailang trabahante sa Procter and Gamble sa Laguna.

Matod ni PSupt. Ibrahim Jambiran, hepe sa station 1, na obserbaran sa mga kawani sa Shell Gasoline Station ang maong suspek nga taud taud og istambay sa maong gasolinahan, busa gitawagan ang kapolisan sa suspetsang may dautang tuyo ang suspek.

Base sa report sa kapolisan, nag sugod pag istambay ang suspek alas 9 hantud alas 11 sa buntag hinungdan nga nag duda na ang taga gasolinahan.

Sa pagsusi sa kapolisan, nakuha gikan sa posisyon sa suspek ang usa ka Armed Forces and Police Savings and Loan Association Inc. (AFPSLAI) nga I.D ug cellphone niini nga gisusi pa sa kapolisan ang sud niini.
Ang maong I.D nakapangan sa usa ka Gilbert Esperas, pulis Ormoc apan matod sa kapolisan gihimo kini karon nga bodyguard ni Mayor Edward Codilla.

Matod sa suspek, nga dunay usa ka ginganlan og Helen ang nagsugo kaniya nga ipalukat ang play station 3 nga giprenda ngadto kang Esperas nga naa nagtrabaho sa New Capitol sa dakbayan sa Ormoc.
Dugang sa suspek, gipadala ni Helen ang I.D ni Esperas ngadto kaniya kay mao kini ang silbi ‘resibo’ ni Gilbert nga gihatag ngadto kang Helen sa pagprenda sa play station.
“Bali inig lukat sa ps3 ihatag ni ang I.D og balik ngadto kang Gilbert” pasabot sa suspek.
Niingon ang suspek nga giadto niya sa New Capitol si Esperas apan wala didto.

Sa dihang gipangutana kung asa dapit ang New Capitol, wa masayud ang suspek basta naa daw sa Ormoc.
Wala namay New Capitol ang dakbayan sa Ormoc busa ingon ang kapolisan nga basin og City Hall.
Dugang pa sa suspek nga igo ra siya nag huwat og kasakyan pauli sa Naval sa dihang gidakop siya sa mga pulis.

“Last week pa man na sir, unya nibalik lang gyod ko diri bisag wa koy kwarta. May nahitabo sab sa ako gabie sir, diha sa plaza gipanguha akong mga gamit, sa kalisang nako mao to nidagan ko padung Cogon unya gipahibawo nako ako nanay unya niingon ako nanay nga huwata kay ako tawagan ang duptours” matod sa suspek.

Gihimakak naman sa suspek nga nagpaila siya nga pulis sa maong gasolinahan.
“Di na mahitabo kay di ko pulis, wa sab koy intensyon nga dautan sir” dugang sa suspek.
Gipatawag naman ni Jambiran si Esperas aron maimbestigar sa maong hitabo.

Follow-up Report:

Nagpailang pulis nga nasikop, nakuhaan og ‘shabu’ ug paraphernalia

02-28-2015
John Kevin D. Pilapil
Power 90.3 FM/Serbisyo Publiko Sa Radyo

LEYTE- Giandam na sa kapolisan sa Ormoc City Police Station 1 ang mga dokumento sa pagpasaka og kasong ‘usurpation of authority’ ug illegal possession of dangerous drugs batok sa suspek nga si Ronald Allan Vicera.

Si Vicera nasikop kahuman ni report ang kawani sa usa ka gasolinahan sa dan Real dakbayan sa Ormoc gahapon sa buntag nga may kadudahang tawo nga nag istambay sa gasolinahan gikan alas 9 hantud alas 11 sa buntag.

Giingon nga si Vicera nagpaila pa nga usa siya ka pulis ug nakuha gikan sa iyang posisyon ang usa ka Armed Forces and Police Savings and Loan Association Inc. (AFPSLAI) nga I.D nga iya ni PO1 Gilbert Esperas, nga bodyguard ni Mayor Edward Codilla.

Gipatawag ni Station 1 chief, PSupt. Ibrahim Jambiran si Esperas apan nihimakak kini nga kaila siya sa suspek samtang ang I.D. gikompirmar ni Jambiran nga ‘expired’ na.

Sa gihimong body search ni PO1 Juljabar Abah kang Vicera sa dihang gisud kini og balik sa selda human sa imbestigasyon, nakompiska ang 1 ka lighter, 1 ka tooter, 1 ka pinilo nga foil ug 3 ka pakete sa gituhoang shabu.

Gisusi ni Jambiran ang background sa suspek sa Naval Police Station ug nasayran nga mao kini ang giingong mamaligyaay og gituhoang shabu sa lugar.

Atol sa pagkasikop, gituhoang sabog pa ang maong suspek.

Gidala na sa crime laboratory ang gituhoang shabu nga nakuha alang sa Qualitative ug Quantitative tests.

Follow-up Report:

Nag paila nga pulis niangkon nga migamit og ‘ilegal nga droga’
03-02-2015
John Kevin D. Pilapil
Power 90.3 FM/Serbisyo Publiko Sa Radyo

LEYTE- Nakigkita ganihang buntag sa hepe sa Ormoc City Police Station 1 (PS1) ang inahan ni Ronald Allan Vicera kinsa na bilango human nagpailang pulis sa usa ka gasolinahan ug nakuhaan og pipila ka pakete sa gituhoang shabu.

Si Fritzi Vicera, inahan ni Ronald Allan Vicera.
Si Fritzi Vicera, inahan ni Ronald Allan Vicera.

Matod ni Fritzi Vicera, inahan sa suspek, nga wa siya magtuo nga mao kini ang dangatan sa iyang anak.
Gibutyag sa inahan nga nitug-an kaniya iyang anak nga sa una pa kini madakpi, nigamit kini og ilegal nga droga.

Sa dihang gipangutana sa Serbisyo Publiko Sa Radyo Newsteam ang suspek, niangkon usab kini nga hubog siya niadtong tungora ug ‘sabog’ siya sa ilegal nga droga.

Dugang pa sa inahan nga uyon nalang siya nga naa sa sud sa bilangoan ang iyang anak.
“bag-o raman gud na siya nisud anang bisyoha, na grabehan siguro” matod pa sa inahan nga sige og hilak atubangan sa iyang anak.

Nihangyo ang inahan kang PSupt. Ibrahim Jambiran, hepe sa PS1 nga adto nalang sa Naval ibalhin pag bilango ang iyang anak aron duol ra inig duaw.

Gidawat naman ni Jambiran ang mga negatibong komento sa mga tawo kabahin sa pagkasakmit sa pipila ka pakete sa gituhoang shabu.
“tangap ko naman yung mga negative comments nila, ang importante na alam na ng ina nung suspek ang totoong nangyari, sinabihan ko na yung ina na siya na bahala magsabi sa mga kapatid kung ano nangyari, basta tutulongan ko sila na mailipat sa Naval si RA (Ronald Allan) para ba mas malapit” pasabot ni Jambiran.

LEAVE A REPLY

Please enter your comment!
Please enter your name here