By Justine Traya
RMn

TACLOBAN CITY – Talwas na an 9 nga mga menor de edad matapos ma-rescue ha ginbuhat nga Entrapment operation han National Bureau of Investigation Anti-Human Trafficking Division (NBI-AHTRAD) ha syudad han Tacloban ngan probinsya han Biliran.

An mga kabataan in biktima hin online sexual exploitation of children (OSEC) nga may pangidaron nga 4 ngadto 17 anyos. Upat naman dinhi an ada na ha sakto nga pangidaron an na-rescue.

Ha gin buhat nga entrapment operation ha Tacloban, na-rescue an 2 nga menor de edad nga nag-eedad 15 ngan 17 anyos.

Tulo nga suspek an naaresto, lakip an bugto han usa nga biktima nga gin-ngaranan nga Jessa (diri tinuod nga ngaran), lalake nga live-in-partner, ngan usa nga Monica (diri tinuod nga ngaran). Gin-tutuohan nga hi Jessa ngan Monica in mag-patod.

Naaktuhan han mga NBI Agents an mga suspek nga ginbubugaw ngan gin-aabuso an duha nga menor de edad samtang nag lalive-stream kabalyo hin kwarta tikang ha foreigner. Duha naman nga adult victim an na-rescue.

Na-recover ha balay ni Jessa an usa nga computer ngan cellphone.

Ha ika duha naman nga operasyon han NBI ha usa nga balay ha munisipalidad han Culaba ha Biliran kun diin hi Monica nag-ooperate hin cyber-sex den.

7 nga bata nga nag eedad 4 ngadto 17 anyos ngan duha nga ada na ha sakto nga pangidaron an na-rescue.

Kadam-an ha mga biktima in paryente la mismo han mga suspek.

Nakumpiska ha lugar, an usa nga desktop computer nga may webcam ngan usa nga smartphone.

Sumala han NBI, kun mapamatud-an nga may sala an mga suspek in mag-aatubang hira hin life imprisonment ha ilarom han RA 10364 o human trafficking.

An pareho nga kaso in nagtikang pinaagi han International referral tikang ha UK National crime agency matapos maaresto ngan mapreso an usa nga UK citizen nga ginkilala kan Alain Charlwood-Collings matapos mapamatud-an nga nagbubuhat hin sexual offenses ha mga minor de edad nga pinoy lakip na an child sexual assault ngan child pornography. Hiya in nag ukoy ha Biliran dida han tuig 2008-2012.

Gin babana-bana nga 35 ngadto 46 na an nabiktima ni Charlwood-Collings ha Biliran province. Hiya in naaresto han UK Police kun diin nakumpiska an 107 nga sexual videos han mga Pilipino nga kabataan.

LEAVE A REPLY

Please enter your comment!
Please enter your name here