NAVAL, Biliran — Tungod sa makaalarma na nga pagsaka sa mga kaso sa Human Immuno Virus-Acquired Immune Defficiency Syndrome (HIV-AIDS) sa nasud, lakip na sa probinsiya sa Biliran, gihatagan sa kakayahan ang Biliran Provincial Hospital nga makatambal sa maong sakit.
Sumala pa sa pagpamulong ni Boyd Roderick Cerro, regional HIV-AIDS program coordinator sa Department of Health (DOH) Eastern Visayas, atol sa gipahigayon nga multi-sectoral forum kabahin sa HIV-AIDS didto sa Naval gymnasium kagahapon nga adlaw, mikabat na sa kapin 51,000 ang mga kaso HIV-AIDS sa Pilipinas sukad pa niadtong 1984 diin mikabat sa 1,021 ang mga gikatahong bag-ong kaso sa unang bahin sa tuig 2018.
Si Cerro mipasabot sa panaad sa DOH pagtago sa pagkatawo sa mga tawong mosumite sa pagpatambal aron dli sila makasinati sa pagpihig kanila sa katilingban.
Si Cerro midugang nga aduna sila’y paagi o estratehiya pagtago sa mga tawong mopaubos pagpatambal sa DOH.
Sanglit iyang giawhag kadtong adunay pagduda sa ilang kaugalingon sa pagsumite sa HIV-AIDS screening ug mopaubos sa pagtambal aron masumpayan pa ang ilang kinabuhi ug dili na makapanakod pa sa uban kung sila magsunod na sa mga tambag sa DOH. # (mlt/PIA8 Biliran)
