Sikop ang mga pumpboys nga miunay ug lungkab sa ilang gitrabahuan

BiliranIsland.com Staff
BiliranIsland.com
First Posted 06:36:00 PM 7/28/2020

Almeria, Biliran – Kasamtangan karon nga nagtingkagol na ang duha ka mga batan-on nga mga pumpboys sa usa ka gasoline station human sila makuhai ug footage sa CCTV nga miunay sa pagtulis sa ilang gitrabahoan.

Basi sa CCTV footage, nahitabo ang pagpanglungkab sa Mighty Gasoline Station sa lungsod sa Almeria, Biliran alas 12:48 sa kaadlawon niadtung Biernes, Hulyo 24.

Matud pa sa taho, si Maria Angela Aquiles, in charge sa gasolinahan, 22, dalaga, taga Brgy. Cagnocot, Villaba, Leyte ang nag report sa kapolisan mga alas 6:15 sa buntag niadtung adlawa. Matud pa niya, namatngonan sa iyang kauban na cashier nga ang door knob sa ilang gasolinahan ang giguba. Pagsulod niya sa sakob, iyang nakita nga naguba na ang vault sa ilang gasolinahan diin may sulod kini nga kapin kung kulang P820,418.00.

Sa pagresponde sa kapolisan ila gilayon pagreview ang CCTV, ug didto ilang nakita nga ang mga kawatan miguba sa door knob sa main entrance ug sa dihang nakasulod na kini ila dayon giyawihan ang vault ug gikuha ang tanan sulod niini.

Nakit-an usab sa CCTV nga gikuha sa mga suspek ang yawe didto kwarto sa kauban nila nga cashier.

Apan way swerte ang mga mga tulisan nga nanglungkab kay wala makasabot nga aduna diay CCTV sa sakob ug nakuhaan sila ug footage.

Giila ni Aquiles ang mga nanglungkab nga sila si Marvin Pungtan, 23, ulitawo, pumpboy sa gasolinahan, nga taga Brgy. Cmpocpoc, Tabango, Leyte ug Christopher Dagoy, 29, ulitawo, pumpboy nga taga Brgy. Macabug, Ormoc City.

Ang duha nga wala makasabot nga adunay CCTV sa sakob sa ilang gilungkab ang didto lang usa sa ilang trabahoan nga murag wala lay nahitabo.

Sayon ra kaayo nga gipangdakop ang mga suspek didto sakop sa gasolinahan ug gipasakaan na ug kasong pagpangawat didto sa Provincial Prosecutors Office.