Tricycle drayber balhug sa prisohan

By BiliranIsland.com Staff
Published 04:50 PM, May 25, 2021
BiliranIsland.com

Naval, Biliran— Tanggong karon sa karsel sa kapolisan ang usa ka tricycle drayber human kini makuhai ug armas, ug mga bala sa gipatigayong ronda sa balay niini mga 5:30 ang takna sa buntag kagahapon Lunes (Mayo 24) sa Brgy Lucsoon, Naval, Biliran.

Giila sa hepe sa Naval Police Station ang nasikop nga suspek nga si Edgardo Dacudag, a.k.a “Dodong”, 54, minyo, tricycle drayber ug residente sa nahisgutang barangay.

Ang pagsikop sa suspek nagagikan sa Search Warrant No. 21-03 nga penitsahan ug May 18, 2021, nga gipagawas ni Hon. Plenio B. Dela Peña, ang Presiding Judge sa 3rd Municipal Circuit Trial Court Caibiran-Culaba, Biliran tungod sa paglapas sa Section 28 of R.A. 10591 kon (Illegal Possession of Firearms and Ammos), diin ang korte mimando sa kapolisan sa pag ukay sa tanan parte sa sulod sa balay sa suspek.

Nakuha sulod sa balay niini ang usa ka Caliber .38 revolver nga may tatak (Smith & Wesson) apan walay serial number. Nakuha usab ang unom ka mga buhing bala sa nahigutan nga kalibre.

Apan midaku ang problema ssa suspek sa dihang ang mga kapolisan nakarekober didto sa balay niini ug usa ka bala sa M203.

Walay gibuhian nga pahayag ang suspek kabahin sa mga epektos nga nakuha kaniya.

Gipasaka na sa Provincial Prosecutors Office ang kaso ngadto sa suspek nga nagtingkagol karon sa prisohan sa Naval Police Station.