Opisyales sa SK gidakop, nanglugos kono

By BiliranIsland.com Staff
Published 9:30 AM, June 9, 2022
BiliranIsland.com

Naval, Biliran – Nagtingkagol sa Naval Police Station ang Chairman sa Sangguniang Kabataan (SK) sa Barangay Sto Niño, lungsod sa Naval sa lalawigan sa Biliran ug ang SK Federation President sa lungsod sa Naval sa Miyerkules, Hunyo 8, sa alas 9:00 sa buntag.

Ang suspek giila nga si Juan Paulo C. Crisostomo, 23, ulitawo, SK Chairman sa Brgy. P.I. Garcia ug SK Federation President sa Naval ug Cris Jay P. Golin, 25, may kapuyo, SK Chairman sa Barangay Sto Niño.

Nasayran nga namista ang duha ka opisyales didto sa Barangay PS Eamiguel, niadtong Hunyo 7, 2022.

Matud pa sa taho nakig inom sa biktima nga usa ka menor de edad ang duha ka opisyales. Pagka human nila og inom ning adto sila sa sayawan para mang disco.

Mga alas 2 pasado sa kaadlawon, mihangyo si Golin sa biktima nga ihatod sa AR La Naval Hotel ang ilang kauban nga si Crisostomo kay nahubog na kini.

Sa sulod sa kwarto sa Hotel, gi asoy sa biktima nga gi pugos siya og lugos kono ni Crisostomo ug gi sundan siya og lugos ni Golin.

Sigon pa sa biktima, migawas siya sa hotel mga alas 6 sa buntag ug ning diretso sa Police station sa lungsod sa Naval para mangayo og tabang.

Nakagawas siya sa kwarto kai nangatulog ang mga suspek.

Gilayong girespondehan sa Women and Children Protection Desk (WCPD) sa Naval PNP ang maong hitabo hinungdan nga nasikop ang mga suspek didto sa na asoy nga hotel.

Ang biktima milig-on sa iyang affidavit aron mapasaka ang kaso didto sa korte.

Ang mga suspek pasakaan og kasong statutory rape, violation sa RA 116481.

Ning kasamtangan nagtingkagol ang mga suspek sa selda sa Naval PNP. – BiliranIsland.com