ALMERIA, Biliran (BDEO)- Nakompleto na sa Department of Public Works and Highways (DPWH)–Biliran District Engineering Office (DEO) ang proyekto sa road widening subay sa Barangay Talahid, Matanggo, ug Tabunan sa lungsod sa Almeria, nga gilauman makapaayo sa kaluwasan, accessibility, ug mobilidad sa probinsya.
Ang maong proyekto gipundohan ilawom sa FY 2025 General Appropriations Act (GAA) nga adunay kantidad nga Php 39 milyon. Lakip sa gihimo ang concreting sa 1.204 lane kilometers, road widening, pagpahimutang og road shoulders, kanal, ug slope protection structures.
Gipasiugda ang proyekto aron suportahan ang lokal nga kalamboan ug matubag ang nagkadaghang mga road users, pinaagi sa paghatag og mas luwas ug mas episyenteng biyahe alang sa mga motorista, commuters, ug pagtransportar sa mga produkto ug serbisyo.
Matod ni District Engineer Irwin L. Antonio, dako ang kontribusyon sa proyekto sa turismo ug ekonomikanhong kalamboan sa maong lugar.
“Dako kining tabang sa pagpaayo sa access padulong sa mga tourist destinations sa Almeria ug maambag sa pagdasig sa turismo ug lokal nga panginabuhian,” matod ni Antonio.
Gilauman sa DPWH-Biliran DEO nga pinaagi sa nahuman nga proyekto, mas mapalambo pa ang konektividad ug mamugna ang dugang oportunidad alang sa komersyo ug turismo sa Almeria ug kasikbit nga mga lungsod. Ang implementasyon sa proyekto nahimong posible pinaagi sa makanunayong suporta ni Hon. Gerardo J. Espina Jr., Representate sa nag-inusarang Distrito sa Biliran.
