- 85shares
- Share on Facebook
- Share on Twitter
By:Rodrigo S. Victoria
NAVAL, Biliran (PIA) – Mosalmot ang probinsya sa Biliran sa pagabuhaton nga Million Volunteer Run 3 nga gipasiugdahan sa Philippine Red Cross (PRC) nga gikatakda nga dungan nga ipahigayon sa tibuok nasud Pilipinas sa Desyembre 13, 2015.
Mismo si Atty. Mike Tezon, chairman ug Edwin Pamonag, administrator sa PRC-Leyte Chapter, personal nga mitambong sa gipahigayon nga panagtigom sa mga gi-imbitar nga mga posible nga mosalmot sa pagabuhaton nga Million Volunteer Run 3.
Mitambong sa panagtigom nga gipahigayon kaganinang buntag didto sa Governor’s Hall mao ang mga municipal social welfare and development officers sa walo ka mga lungsod sa probinsya sa Biliran kauban ni Flordeliza Trani, Biliran provincial social welfare and develoment officer, mga representante sa mga ahensya nasyonal ug mga mga non-government organizations nga ania mahamutang sa probinsya sa Bililran.
Ang pagtambong sa mga opisyal sa PRC-Leyte Chapter sa maong panagtigom mao ang pagplano sa mga lakang nga pagabuhaton aron nga mapahapsay ug mas daghan ang mosalmot sa pagabuhaton nga Million Volunteer Run 3.
Matud pa ni Atty. Tezon nga mao kini ang unang higayon nga ang probinsya sa Biliran mosalmot niini nga Million Volunteer Run pinaagi sa koordinasyon sa PRC-Leyte Chapter.
Si Atty Tezon nagkanayon nga kini nga Million Volunteer Run 3 gitumong usab nga makakuha diha sa lista sa Guiness Book of World’s Record sa pinakadaghan nga misalmot nga mga volunteer runners sa usa ka higayon.
